មូលហេតុ​ទាំង ១១​ ចំណុចដែលធ្វើឲ្យមនុស្សស្រីបដិសេធស្នេហ៍ពីអ្នក

,

សួស្ដី​ប្រិយមិត្ត​បុរសៗ​ទាំង​អស់ តើ​ធ្លាប់​មាន​បទពិសោធន៍​ធ្លាប់​លួច​ស្រលាញ់​នារី​ណា​ម្នាក់​ដែរ​ឬទេ? ហើយ​មាន​បាន​សារភាព​ក្ដី​ស្រលាញ់​អោយ​នាង​បាន​ដឹង​ដែរ​ឬ​អត់? ប្រសិន​បើ​ធ្លាប់​ស្រលាញ់ ហើយ​ក៏​ហ៊ាន​សារភាព​ប្រាប់​ទៅ​កាន់​នាង ប៉ុន្តែ​ក្រោយ​ពេល​សារភាព​ហើយ​ មិន​ត្រឹម​តែ​មិន​ទទួល​បាន​ចម្លើយហើយ​បែរ​ជា​ទទួល​អារម្មណ៍​ថា​ នាង​បែរ​ជា​ព្យាយាម​គេច​ពី​អ្នក​ទៅ​វិញ​នោះ តើ​នេះ​មាន​ន័យ​បែបណា? ហើយ​តើ​មូលហេតុ​អ្វី​បាន​ជា​នាង​ធ្វើ​បែប​នេះ បើ​មុន​ពេល​សារភាព​ រូប​អ្នក​ហើយ​នឹង​នាង​គឺ​ស្និទស្នាល​នឹង​គ្នា​ខ្លាំង​ផង​នោះ?

កញ្ញា លីណា

តោះ​បើ​ពិត​ជា​ធ្លាប់​ជួប​បែប​នេះ​មែន មក​តាម​ដាន​ជាមួយ​នឹងយើងនូវ​មូលហេតុ​ ១១​ចំណុច​នេះ​ ដែល​នារីៗ​ភាគ​ច្រើន​ហាក់​ព្យាយាម​គេច​មុខ ពី​អ្នក​សារភាព​ស្រលាញ់​ចំពោះ​ខ្លួន តែ​មិន​ព្រម​ឆ្លើយ​តប ឬ​មួយ​ក៏​បដិសេធ ដូច​ខាង​ក្រោម៖

១) អ្វីៗហាក់ដូច​ជា​លឿន​ពេក​សម្រាប់​នាង

ជា​ការ​ពិត​ពី​ដំបូង​នាង​ប្រហែល​ជា​ស្និទស្នាល​ជាមួយ​នឹង​រូប​អ្នក ក្នុង​ន័យ​មិត្តភាព​ធម្មតា ហើយ​មិន​រំពឹង​ថា​អ្នក​នឹង​ស្រលាញ់​នាង​សោះ​ឡើយ។ ដូច្នេះ​ក្រោយ​ពេល​ដែល​អ្នក​សារភាព នាង​ហាក់​មាន​អារម្មណ៍​ច្របូក​ច្របល់​ និង​ ភ្ញាក់​ផ្អើល។

ឬ​ជួន​កាល​នាង​អាច​នឹង​មាន​អារម្មណ៍​ភ័យ​ខ្លាច​បន្តិច​បន្តួច នៅ​ពេល​ដែល​អ្វី​ៗ​វា​ហាក់​បី​ដូច​ជា​លឿន​ពេក ទាំង​ដែល​ខ្លួន​នាង​ផ្ទាល់​មិន​ទាន់​បាន​ត្រៀម​លក្ខណៈ​អោយ​បាន​រួច​រាល់​ក្នុង​ការ​ ទទួល​យក​នូវ​ការ​ស្រលាញ់​មួយ​នេះ ហើយ​នាង​អាច​ចង់​ដក​ឃ្លា​ដើម្បី​ធ្វើ​ការ​ពិចារណា​ពី​វា​អោយ​បាន​ហ្មត់​ចត់​ប៉ុណ្ណោះ​។ អ្វី​ដែល​អ្នក​គួរ​ធ្វើ​គឺ​រង​ចាំ​ និង​ទុក​ឱកាស​អោយ​នាង​ ហើយ​នៅ​ពេល​ដែល​នាង​ត្រៀម​លក្ខណៈ​រួចរាល់​ហើយ អ្នក​ប្រាកដ​ជា​ទទួល​បាន​ចម្លើយ​ដែល​ចេញ​ពី​ចិត្ត​របស់​នាង​ពិត​ៗ ទោះ​ជា​ពេល​ខ្លះ​វា​អាច​ជា​ចម្លើយ​ដែល​អ្នក​មិន​ត្រូវ​ការ​ក្ដី តែ​យ៉ាង​ហោច​ណាស់​ក៏​ល្អ​ជាង​មិន​មាន​ការ​ឆ្លើយ​តប​ណា​មួយ​ដែរ តើ​ត្រឹម​ត្រូវ​ទេ?

២) អ្នក​ហាក់​បី​ដូច​ជា​បង្ហាញ​ចេញ​ការ​ស្រលាញ់​ខ្លាំង​បន្តិច

ឥរិយាបថ​ក្នុង​ការ​សារភាព នឹង​បង្ហាញ​ក្ដី​ស្រលាញ់​ចំពោះ​នាង​ គឺ​វា​ហាក់​បី​ដូច​ជា​ខ្លាំង​ក្លា​បន្តិច។ នេះ​មិន​មែន​ជា​រឿង​មិន​ល្អ​នោះ​ទេ ក៏​ប៉ុន្តែ​សម្រាប់​នាង​វា​ហាក់​បី​ដូច​ជា​ពិបាក​ក្នុង​ការ​ទទួល​យក ពិ​ព្រោះ​នាង​ទទួល​អារម្មណ៍​ថា​វា​លើស​លប់​ខ្លាំង​ពេក​ទៅ​វិញ។ អ្វី​ដែល​អ្នក​គួរ​ធ្វើ​គឺ​ធ្វើ​អ្វីៗ​ទៅ​តាម​សម្រួល​និង​សន្សឹមៗ ប្រសិន​បើ​អ្នក​ពិត​ជា​ស្រលាញ់​នាង​ពិត​មែន ហើយ​ចង់​ទាក់​ទង​ជាមួយ​នឹង​នាង​គួរ​ទុក​ពេល និង​គម្លាត​អោយ​នាង សូម​កុំ​ធ្វើ​អោយ​នាង​ទទួល​អារម្មណ៍​ថា​ត្រូវ​តាម​លង​បន្លាច​ ដោយ​សារ​ការ​ស្រលាញ់​របស់​អ្នក​អោយ​សោះ។

៣) នាង​មាន​អារម្មណ៍​ភ័យ​ខ្លាច

ជា​ការ​ពិត​ការ​ស្រលាញ់​នរណា​ម្នាក់ ឬ​ការ​មាន​ស្នេហា​គឺ​ជា​រឿង​ដែល​ធំដំ​ណាស់​សម្រាប់​មនុស្ស​ម្នាក់​ៗ ហើយ​ពិត​ជា​មិន​អាច​លេង​សើច​បាន​ទេ។ សម្រាប់​អ្នក​ដែល​ធ្លាប់​មាន​បទពិសោធន៍ ស្រលាញ់​គេ​ហើយ​ត្រូវ​គេ​បដិសេធ​ទៀត​នោះ គឺ​រឹត​តែ​ខ្លាច​ស្នេហា ហើយ​មាន​ការ​ប្រុង​ប្រយ័ត្ន​មុន​ពេល​ដាក់​ចិត្ត​ស្រលាញ់​នរណា​ម្នាក់​ម្ដង​ទៀត។

ជួន​កាល​នាង​ក៏​អាច​ចូល​ចិត្ត​អ្នក​ដូច​គ្នា​ដែរ ក៏​ប៉ុន្តែ​ពេល​ខ្លះ​នាង​អាច​ត្រូវ​ការ​ពេល​ច្រើន​ដើម្បី​ធ្វើ​ការ​ពិចារណា ហើយ​បើ​នាង​ធ្លាប់​ខក​ចិត្ត​ក្នុង​រឿង​នេះ​ទៀត​នោះ នោះ​នាង​រឹត​តែ​ត្រូវ​ការ​ពេល​វេលា​ច្រើន​។ អ្វី​ដែល​គួរ​ធ្វើ ​អ្នក​ពុំ​គួរ​ដាក់​សម្ពាធ​អោយ​នាង ហើយ​ទាម​ទារ​ចម្លើយ​ភ្លាមៗ​នោះ​ទេ ទុក​ឱកាស​និង​ពេល​វេលា​អោយ​នាង ហើយ​សឹម​រក​ពេល​វេលា​សាក​សម​ណា​មួយ​ ដើម្បី​សុំ​និយាយ​ជាមួយ​នឹង​នាង​ម្ដង​ទៀត។

៤) នាង​ត្រូវ​ការ​ពេល​ដើម្បី​ពិចារណា

ជាការ​ពិត​នាង​ក៏​ចូល​ចិត្ត​អ្នក​ដូច​គ្នា​ដែរ ប៉ុន្តែ​នាង​គ្រាន់​តែ​ចង់​អោយ​ច្បាស់​ចិត្ត​របស់​ខ្លួន​ប៉ុណ្ណោះ។ ប្រហែល​ជា​ការ​សារភាព​របស់​អ្នក​គឺ នាង​មិន​នឹក​ស្មាន​ដល់ ហើយ​ឥលូវ​នេះ​នាង​មាន​អារម្មណ៍​ថា​ភ្ញាក់​ផ្អើល​បន្តិច។ អ្វី​ដែល​នាង​ត្រូវ​ការ​គឺ​ពេល​វេលា ដើម្បី​អោយ​ប្រាកដ​ក្នុង​ចិត្ត​ថានេះ​ជា​ការ​ស្រលាញ់​ដែល​នាង​ចង់​បាន ហើយ​និង​ពិចារណា​ថា​តើ​ទំនាក់​ទំនង​នេះ​វា​ល្អ​សាកសម​សម្រាប់​ខ្លួន​នាង​ដែរ​ឬទេ។ ចំពោះ​ចំណុច​នេះ នាង​គ្រាន់​តែ​ត្រូវ​ការ​ពេល​វេលា​ដើម្បី​សម្រប​ខ្លួន​ប៉ុណ្ណោះ សូម​អ្នក​ជជែក និង​ពិភាក្សា​រឿង​នេះ​ដោយ​ចំហរ​ជាមួយ​នឹង​នាង។

៥) នាង​មិន​មាន​អារម្មណ៍​ដូច​អ្នក

នាង​អាច​ទៅ​ដើរ​កម្សាន្ដ ឬ​ date ជាមួយ​នឹង​អ្នក​ដើម្បី​ពិនិត្យ​មើល​ថា តើ​រវាង​អ្នក​ទាំង​ពីរ​អាច​ទៅ​រួច​ឬ​ក៏​អត់ ហើយ​ជា​លទ្ធផល​គឺ​នាង​មិន​មាន​អារម្មណ៍​ជ្រាលជ្រៅ​ណាមួយ​ជាមួយ​នឹង​អ្នក​ទេ។ ជួន​កាល​អ្នក​ជា​មនុស្ស​ប្រុស​ដែល​ល្អ ប៉ុន្តែ​សម្រាប់​នាង​ អ្នក​នៅ​ខ្វះ​ខាត​ចំណុច​ខ្លះ​ដែល​នាង​ត្រូវ​ការ។ នេះ​មិន​មែន​មាន​ន័យ​ថា​អ្នក​មិន​ល្អ​នោះ​ទេ ពី​ព្រោះ​អ្នក​មាន​គុណសម្បត្តិ​ដែល​ជា​ខ្លួន​របស់​អ្នក ប៉ុន្តែ​គ្រាន់​តែ​គុណសម្បត្តិ​ទាំង​នោះ មិន​មែន​ជា​អ្វី​ដែល​នាង​ត្រូវ​ការ​ប៉ុណ្ណោះ។ នាង​ដឹង​ច្បាស់​ពី​ចំណុច​ទាំង​នេះ ហើយ​ដោយ​សារ​មិន​ចង់​បដិសេធ​អ្នក​ដោយ​ផ្ទាល់​ ទើប​នាង​សម្រេច​ជ្រើស​យក​ការ​ដក​ខ្លួន​ចេញ និង​បន្ថែម​គម្លាត​រវាង​អ្នក​ទាំង​ពីរ​។

៦) នាង​មិន​ប្រាកដ​នៅ​ក្នុង​ចិត្ត

សម្រាប់​ចំណុច​នេះ​វិញ នាង​អាច​ចូល​ចិត្ត​អ្នក​ដូច​គ្នា​ដែរ ក៏​ប៉ុន្តែ​នាង​មិន​ទាន់​ច្បាស់​នៅ​ក្នុង​ចិត្ត​ ១០០%​ ថា​អ្នក​គឺ​ជា​មនុស្ស​ប្រុស​ដែល​នាង​ចង់​ទាក់​ទង​ជាមួយ​នៅ​ឡើយ។ ប្រសិន​បើ​បែប​នេះ​ពិត​មែន នាង​នឹង​ចាប់​ផ្ដើម​សាក​ល្បង​រូប​អ្នក ហើយ​ប្រសិន​បើ​នាង​ចាប់​ផ្ដើម​បន្ថែម​គម្លាតពី​អ្នក​ នោះ​ប្រហែល​ជា​អ្នក​មិន​មែន​ជា​បុរស​ដែល​នាង​ចង់​បាន​នោះ​ទេ។ ដែល​នេះ​នឹង​ក្លាយ​ជា​រឿង​ល្អ​ទៅ​វិញ​សម្រាប់​អ្នក ពី​ព្រោះ​អ្វី​ៗ​វា​មិន​អូស​បន្លាយ ឬ​ឈាន​ដល់​ដំណាក់​កាល​បក​ក្រោយ​លែង​បាន។

៧) អ្នក​គ្មាន​ការ​អត់​ធ្មត់​គ្រប់​គ្រាន់

មូល​ហេតុ​ធំ​បំផុត​ ដែល​ crush ព្យាយាម​ធ្វើ​ខ្លួន​ឆ្ងាយ​ៗ​ពី​អ្នក គឺ​ដោយ​សារ​តែ​អ្នក​គ្មាន​ចិត្ត​អំណត់ ហើយ​ចង់​អោយ​អ្វីៗ​ទៅ​លឿន​ជ្រុល​ពេក។ អ្នក​ចូល​ចិត្ត​នាង ចំណែក​នាង​ក៏​ចូល​ចិត្ត​អ្នក ប៉ុន្តែ​អ្នក​បែរ​ជា​ព្យាយាម​និយាយ​រឿង​រៀប​ការ ឬ​ការ​ភ្ជាប់​ពាក្យ ខណៈ​ពេល​ដែល​អ្នក​ទាំង​ពីរ​ទើប​តែ​ជួប​គ្នា​បាន​ត្រឹម​ពីរ​ទៅបី​ដង។ អ្វី​ដែល​អ្នក​គួរ​ធ្វើ គឺ​កុំ​ព្យាយាម​ធ្វើ​អ្វី​ៗ​អោយ​លឿន​ជ្រុល​ពេក បើ​នាង​ចូល​ចិត្ត​អ្នក​ហើយ នោះ​អ្នក​មិន​ចាំ​បាច់​បារម្ភ​នោះ​ទេ។ គ្រាន់​តែ​រីករាយ​ជាមួយ​នឹង​ទំនាក់​ទំនង​ជា​សង្សារ​របស់​អ្នក​ទាំង​ពីរ ដោយ​សន្សឹម​ៗ ហើយ​បើ​ទោះ​ជា​អ្នក​ចង់​រស់​នៅ​ក្នុង​នាម ស្វាមី​ភរិយា​ជាមួយ​នឹង​នាង​ក៏​ដោយ ក៏​ពុំ​គួរ​បង្ហាញ​អោយ​នាង​បាន​ឃើញ​លឿន​ពេក​នោះ​ដែរ។

៨) នាង​ចូល​ចិត្ត​ ហើយ​ស្រលាញ់​អ្នក​ខ្លាំង

ជា​ការ​ពិត​នាង​ចូល​ចិត្ត​អ្នក​ខ្លាំង​ណាស់ ប៉ុន្តែ​ក្រោយ​ពេល​ដែល​អ្នក​សារភាព​នាង​បែរ​ជា​បន្ថែម​គម្លាត​ទៅ​វិញ​នោះ នេះ​ប្រហែល​ដោយ​សារ​តែ​នាង​គិត​ថា ចង់​អោយ​ទំនាក់​ទំនង​មួយ​នេះ​នៅ​ត្រឹម​បែប​ធម្មតាៗ ពីព្រោះ​នាង​មាន​អារម្មណ៍​ភ័យ​ខ្លាច​ក្នុង​ការ​បាត់​បង់​អ្នក ឬ​ជួន​កាល​នាង​ត្រូវ​ទទួល​នូវ​ការ​ឈឺចាប់​បើ​សិន​ជា​ស្នេហា​របស់​អ្នក​ទាំង​ពីរ​ដើរ​ដល់​ផ្លូវ​បំបែក។ នេះ​អាច​ជា​ហេតុ​ផល​ប្លែក​ៗ​បន្តិច ប៉ុន្តែ​ដូច​ប្រិយ​មិត្ត​ដឹង​ស្រាប់​ហើយ មនុស្ស​ស្រី​មួយ​ចំនួន​គឺ​បែប​នេះ​ឯង។

៩) នាង​មិន​ទាន់​ចង់​ មាន​ទំនាក់​ទំនង​ផ្ដាច់​មុខ​ជាមួយ​នឹង​អ្នក

ចំណុច​មួយ​នេះ​គឺ​ នាង​ក៏​ចូល​ចិត្ត​អ្នក​ដូច​គ្នា​ដែរ ក៏​ប៉ុន្តែ​ខណៈ​នេះ​នាង​ក៏​មាន​ចំណាប់​អារម្មណ៍​ជាមួយ​នឹង​បុរស​ផ្សេង​ទៀត​ដូច​គ្នា អ្នក​ហើយ​នឹង​បុរស​ទាំង​នោះ​គឺ​សុទ្ធ​តែ​ជា​បុរស​ល្អ។ នាង​មាន​ការ​ពិបាក​ក្នុង​ការ​ជ្រើស​រើស​ ថា​តើ​គួរ​ជ្រើស​យក​បុរស​ណា​ម្នាក់ អ្វី​ដែល​ប្រាកដ​នោះ​គឺ​នាង​ជា​ស្រី​ស្អាត ហើយ​នាង​ពិត​ជា​មិន​ចង់​បាត់​បង់​ឱកាស​ផ្សេង​ទៀត​ ដោយ​ការ​ជ្រើស​រើស​ខុស​នោះ​ទេ។

សម្រាប់​អ្នក​វិញ អ្នក​ប្រាកដ​ប្រជា​ជាមួយ​នឹង​នាង​ ១០០% ប៉ុន្តែ​សម្រាប់​នាង​វិញ នាង​នៅ​ត្រូវ​ការ​សាក​ល្បង​ក្នុង​រឿង​ស្នេហា​នេះ​នៅ​ឡើយ។ នេះ​មិន​មែន​មាន​ន័យ​ថា​ នាង​មិន​ចូល​ចិត្ត​អ្នក​នោះ​ទេ នាង​គឺ​ពិត​ជា​ចូល​ចិត្ត​អ្នក គ្រាន់​តែ​មិន​ទាន់​គ្រប់​ ១០០%​ប៉ុណ្ណោះ។

១០) សម្រាប់​នាង​ អ្នក​គឺ​មិន​ដូច​ពី​មុន

មុន​ពេល​ដែល​អ្នក​សារភាព​ប្រាប់​នាង អ្នក​អាច​ជាមនុស្ស​ប្រុស​ដែល នាង​តាម​ស្រលាញ់​ ហើយ​អ្នក​មិន​សូវ​ជា​យក​ចិត្ត​ទុក​ដាក់​នឹង​នាង​នោះ​ទេ។ ប៉ុន្តែ​ក្រោយ​ពេល​ដែល​អ្នក​លង់​ស្រលាញ់​នាង​ ហើយ​តាម​យក​ចិត្ត​នាង​គ្រប់​បែប​យ៉ាង​ទៅ​វិញ​នោះ នាង​អាច​មាន​អារម្មណ៍​ថា​អ្នក​ផ្លាស់​ប្ដូរ​ ហើយ​អ្នក​ខុស​ពី​ពេល​មុន ដែល​ធ្វើ​អោយ​ចិត្ត​ដែល​ស្រលាញ់​របស់​នាង​ត្រូវ​កាត់​បន្ថយ (សម្គាល់៖ មនុស្ស​ស្រី​មួយ​ចំនួន​គឺ​ប្លែកៗ​បែប​នេះ​ឯង)។

អ្វី​ដែល​អ្នក​គួរ​ធ្វើ​នៅ​ក្នុង​ករណី​នេះ គឺ​គ្រាន់​តែ​យក​ចិត្ត​ទុក​ដាក់​នឹង​នាង​តាម​ធម្មតា ហើយ​ផ្ដល់​ការ​គោរព​និង​អោយ​តម្លៃ​ចំពោះ​នាង ប៉ុន្តែ​មិន​មែន​ព្រម​ចុះចាញ់​នាង​គ្រប់​បែប​យ៉ាង​ដោយ​អំណាច​នៃ​ក្ដី​ស្រលាញ់​នោះ​ទេ។ ប្រសិន​បើ​មិន​ដូច្នេះ​ទេ នាង​នឹង​មាន​អារម្មណ៍​ធុញទ្រាន់ ពី​ព្រោះ​អ្នក​តាម​ចិត្ត​នាង​គ្រប់​ពេល​វេលា។

១១) អ្នក​មិន​បាន​ទុក​ចន្លោះ​អោយ​នាង​ដក​ដង្ហើម

ក្រោយ​ពេល​សារភាព​ អ្នក​សង្កេត​ឃើញ​ថា​នាង​ចាប់​ផ្ដើម​បន្ថែម​គម្លាត​ពី​អ្នក ប៉ុន្តែ​ជំនួស​អោយ​ការ​ពិភាក្សា​ជាមួយ​នឹង​គ្នា ឬ​ទុក​ឱកាស​អោយ​នាង​បាន​ដក​ដង្ហើយ អ្នក​បែរ​ជា​ព្យាយាម​តាម​នាង​ស្ទើរ​គ្រប់​ពេល​វេលា ស្ទើរ​តែ​ធ្វើ​អោយ​នាង​ថប់​ដង្ហើម។ ចំណុច​នេះ ចំណេះ​ យល់​នេះ​អាច​មក​ពី​អ្នក​មាន​អារម្មណ៍​ភ័យ​ខ្លាច ក្នុង​ការ​បាត់​បង់​រូប​នាង​ទៅ ក៏​ប៉ុន្តែ​សូម​ចង​ចាំ​ថា ការ​ធ្វើ​អោយ​នាង​ស្ទើរ​តែ​គ្មាន​ដង្ហើម​ដក​បែបនេះ នឹង​ធ្វើ​អោយ​អ្នក​បាត់​បង់​រូប​នាង​យ៉ាង​ពិត​ប្រាកដ។

អ្វី​ដែល​អ្នក​គួរ​ធ្វើ​នោះ​គឺ ធ្វើ​ការ​ដក​ថយ​ហើយ​ទុក​ពេល​អោយ​នាង​ធ្វើ​ការ​ពិចារណា ហើយ​អ្វី​ដែល​ល្អ​បំផុត គឺ​ធ្វើ​ការ​ពិភាក្សា​ជាមួយ​នាង​ដោយ​ចំហរ។

ផ្តល់សិទ្ធិដោយ៖ ចំណេះ

ស្នេហា